Minstemål og vekt

84cm og 7,2 kg.

Får du kveite over 84 cm som veg under 7,2 kg, skal ho sleppast ut att.
Det same gjeld dersom kveita er over 7,2 kg, men under 84 cm i lengd.

Forbode å fiske

Det er forbode å fiske kveite sør for 62°N heile året.

Det er forbode å fiske kveite nord for 62°N frå og med 20. desember til og med 20. april. 

Forboda gjeld for alle fiskereiskap.

Det er og forbode å fiske kveite heile året i norsk økonomiske sone innanfor eit område avgrensa av rette linjer mellom følgjande posisjonar:

1. N 66° 03′ Ø 006° 54′

2. N 66° 00′ Ø 008° 00′

3. N 65° 44′ Ø 008° 11′

4. N 65° 22′ Ø 007° 39′

5. N 65° 04′ Ø 006° 20′

6. N 65° 30′ Ø 005° 51′.

Utkastpåbod for kveite på over to meter

På grunn av høgt innhald av potensielt farlege framandstoff er det påbode å sleppe all kveite over 2 meter, eller kveite utan hovud over 1,6 meter, ut att i sjøen. Kveite utan hovud over 1,6 meter skal målast som kortaste avstand frå sporden til gjellebogen framfor brystfinna.

Påbodet gjeld i alle norske farvatn og for alle fiskarar (yrkesfiskarar, fritidsfiskarar og turistfiskarar) uavhengig av reiskap og område.

Det omfattar all kveite over 2 meter eller 1,6 meter utan hovud, uavhengig av om ho er levedyktig, daud eller døyande.

Det er eit kjent problem at gammal kveite gjennom heile livet samlar opp framandstoff som kan utgjere ein risiko for oss menneske.

I eit avgrensa område på Sklinnabanken er det eit heilårleg forbod mot å fiske etter kveite (det vil seie at ein kan fiske i området når målarten er noko anna enn kveite).

Mattilsynet si vurdering

Mattilsynet har i si vurdering konkludert med følgjande om Atlantisk kveite:

• Atlantiske kveiter som er mindre enn 2 m (ca.100 kg), har stort sett gode resultat for både tungmetall og organiske miljøgifter. Dei er trygge å ete.

• Atlantiske kveiter over 2m (ca.100 kg) har eit høgt innhald av miljøgifter, også over grenseverdiane for ein eller fleire komponentar. Særleg gjeld dette organiske miljøgifter. Dei bør derfor ikkje etast. Slike store kveiter må sleppast ut i sjøen igjen. Om kveita er tydeleg skadd, må den avlivast før den vert sloppen. Den kan heller ikkje seljast.