Monteringsrettleiing for rømmingshol i sjøkrepsteiner – for fritidsfiskarar

Alle teiner som blir brukte til fangst av sjøkreps, skal ha rømmingshol som blir haldne lukka av bomullstråd.

Bomullstråden og monteringa av denne må oppfylle desse krava:

• Bomullstråden skal ikkje vere tjukkare enn 3 mm i diameter.

• Bomullstråden skal vere ubehandla og utan kjerne.

• Bomullstråden skal festast enkelt, det vil seie at det skal vere tilstrekkeleg at éin tråd ryk for at rømmingsholet opnar seg.

• Monteringa skal gjerast slik at alt som er fanga i teina kan kome seg ut gjennom rømmingsholet når tråden ryk. Har teina fleire sovekammer, skal kvart av desse ha eige rømmingshol.

• Når tråden ryk, skal opninga i rømmingsholet vere så stor at ein sylinder med minst 10 cm i diameter kan førast gjennom.

For teiner med tømmeluke i taket eller på sida, kan rømmingsholet monterast på følgjande måtar:

Metode 1: ramme med hol i sideflata på teina

Ei ramme med hol blir festa i sideflata på teina. Notlinet i holet blir fjerna, og holet blir dekt med ei hengsla luke som deretter blir festa med bomullstråd. Luka skal vere hengsla i nedre del av ramma eller i ein av sidene.

Metode 2: skjære snitt i ein av sideflatane

Det skal skjerast eit snitt i ei av sideflatene som ikkje har kalv (inngang). Snittet skal deretter snørast saman med bomullstråd (sjå figur 2). Bomullstråden skal kun knytast i endane.

Metode 3: lukefeste med hanefot eller løkke

Ei kort løkke eller ein hanefot av bomullstråd blir festa til tømmeluka, og kroken blir hekta i løkka (sjå figur 3 til venstre). Bomullstråden kan òg festast mellom strikken og låsekroken (sjå figur 3 til høgre.). Ved slik montering må sjølve låsekroken festast til ramma på teina med kunstfibertau, slik at han ikkje flyt fritt i havet ved trådbrudd. Kunstfibertauet skal vere langt nok til å lage ei opning på minst 10 cm når bomullstråden ryker.

Teiner laga av fast ramme og notlin

I andre typar teiner enn teiner laga av fast ramme og notlin (plast, tre, netting osv.), og der det ikkje er tømmeluke på sida, skal det lagast eit hol i sida på sovekammeret i teina. Holet skal vere så stort at ein sylinder med minst 10 cm i diameter kan førast gjennom. Opninga skal dekkjast av ei luke (for materiale med fast form kan ei utskoren luke nyttast), som blir festa til teina med bomullstråd. I eitt av festepunkta skal det brukast tråd av kunstfiber for å hindre at luka flyt fritt i havet dersom bomullstråden ryker. Eventuelt kan lukeløysinga skildra under metode 1 nyttast.

Runde teiner av notlin

I runde teiner av notlin skal det skjerast eit hol i taket eller den øvste delen av teina, som deretter blir snørt saman med bomullstråd, slik det er skildra under metode 2.

Samanleggbare havteiner/fisketeiner

I samanleggbare havteiner eller fisketeiner som blir brukte til fangst av sjøkreps, skal rømmingsholet monterast både i inngangskammeret og i sovekammeret. Rømmingsholet skal monterast slik det er skildra under metode 2.