Klagerettar

Du sender klagen din til Fiskeridirektoratet, anten elektronisk eller i posten. 

Viss vi ikkje tek klagen til følgje, sender vi den til Nærings- og fiskeridepartementet for endeleg klagebehandling.

Fristen for å klage er tre veker frå det tidspunktet underretning om vedtaket er komen fram. Dette betyr når vedtaket blei gjort tilgjengeleg i digital postkasse, og varsel om dette er sendt.

Dersom du har behov for å forlengje klagefristen, må du sende oss ein grunngjeven førespurnad før klagefristen går ut. Førespurnaden gir ikkje automatisk rett til utsett frist, men blir vurdert konkret i kvar enkelt sak.

Dersom du klagar for seint, kan vi avvise klagen. Då er det viktig at du gir oss ei forklaring på kvifor klagen blei send inn for seint, slik at vi kan vurdere om klagen likevel kan behandlast.

Dersom du meiner vi ikkje har grunngjeve vedtaket vårt, kan du krevje ei slik grunngjeving før fristen går ut. Ny klagefrist blir då rekna frå den dagen du tek imot grunngjevinga.

Dersom du meiner at vedtaket er feil, kan det skuldast feil i saksbehandlinga eller lovbruken, eller at saka di er behandla på ein uriktig eller uforsvarleg måte. Nokre gonger kan det vere vanskeleg å skilje mellom desse grunnane.

Det viktigaste er at du i klagen gjer greie for kvifor du meiner vedtaket er feil. Du kan ikkje klage på sjølve regelverket, men på vedtaket du har fått.

Du har rett til å be om innsyn i dokumenta i saka di, og som ligg til grunn for saksbehandlinga som leidde fram til vedtaket. Det finst likevel nokre unntak.

Vi kan rettleie deg om korleis du sender ein klage. Kontakt oss på telefon eller skriv til oss, så vil vi kunne rettleie deg.

Dersom du har brukt klagemoglegheitene som finst i forvaltinga, utan å få medhald, har du moglegheit til å sende klage til Sivilombodet. Dette er ein ekstraordinær klagerett, som betyr at Sivilombodet står fritt til å avgjere om dei vil behandle klagen.