Pukkellaks
Pukkellaksen er ein uønskt art i Noreg. Her er det du treng å vite ved fangst av pukkellaks.
Korleis skil du pukkellaks frå annan laksefisk?
Kjenneteikn for å skilje pukkellaks frå våre laksefisk er mørke flekkar på halefinna, svart tunge og kraftig raudfarge i kjøtet.
Reglar ved fangst av pukkellaks i sjø
- Det kan fiskast etter pukkellaks med stong eller snøre.
- Fangst av pukkellaks i sjø skal registrerast på Miljødirektoratet si løysing (stangfiskesjo.miljodirektoratet.no)
- Det er mogleg å fiske pukkellaks med kilenot og lakseverp, sjå forskrifta paragraf 4 (lovdata.no) om det er lov i ditt område.
- Skal du fiske med annan reiskap, må du søke til Miljødirektoratet på post@miljodir.no
Reglar ved fangst av pukkellaks i vassdrag
-
Pukkellaks kan i utgangspunktet berre fangast med stong eller snøre i den perioden det er opna for fiske etter anadrom laksefisk i vassdraget, sjå forskrift om fiske etter anadrome laksefisk i vassdrag paragraf 2 (lovdata.no).
-
Det kan sendast søknad til Statsforvaltaren om å fangste pukkellaks med andre reiskapar. Grunneigarlag eller foreiningar som forpaktar fiskeretten, bør stå bak søknaden. Søknad skal sendast til den respektive statsforvaltaren.
-
Fangsten skal rapporterast som annan anadrom laksefisk i vassdraget.
-
All pukkellaks skal avlivast, han skal ikkje setjast ut att. Dette gjeld òg dersom du elles driv med fang-og-slepp-fiske.
Sal av pukkellaks
Råfisklaget har opna for å bruke salssystema sine både ved fiske og mottak av pukkellaks. Du må fyrst vere registrert hos Noregs Råfisklag med personopplysningar og kontonummer.
Hugs å avtale levering med fiskekjøpar før du startar å fiske.