Merking av reiskap

I fritidsfiske skal alle vak, blåser eller bøyer, på alle reiskap som står i sjøen vere tydeleg merka med eigars namn og adresse. I tillegg skal teiner og ruser vere merka med tilsvarande eigaropplysingar.

For teiner sett i lenke, skal kvar enkelt teine merkast med eigars namn og adresse.

Også sanke- og samleteiner skal merkast med desse opplysingane.

Merket på sjølve reiskapen skal vere godt synleg og vere festa på den øvre delen, slik at den er mindre utsett for slitasje eller avsliting. Merket og dei påførte eigaropplysingane må tole saltvatn, slik at dette er godt leseleg. Som brukar bestemmer du sjølv utforming og størrelse på merket. Du kan lage merket sjølv eller kjøpe det frå ulike utsalsstader.

Det overordna målet med merking av sjølve reiskapen er å redusere marin forsøpling og spøkelsesfiske gjennom at færre tapte fiskereiskapar står att.

Det er ikkje ulovleg å miste reiskap, men på grunn av den store mengda reiskap som årleg blir mista, så må alle bidra til å redusere dette gjennom ansvarleg bruk av reiskap.

Teiner og ruser blir hyppigast brukt i fritidsfiske, og er reiskapane vi finn flest av ved oppreinsking. Derfor gjeld kravet desse reiskapane.

Du kan enkelt bidra til ansvarleg fiske ved å:

• bruke gode og godt synlege vak. Ikkje bruk plastflasker og -kanner!
• ikkje setje reiskapen i ei trafikkert skipslei eller område med sterk straum.
• ta omsyn til vêrforholda.
• ha riktig lengde på tauet: Det bør vere samsvar mellom djupn og taulengde.
• røkte reiskapen etter gjeldande reglar.
• ta kurset: Skitt fiske!