Русский
EnglishRiddar Luther
Arne Martin Luther, regiondirektør i Fiskeridirektoratet Region Troms, vart i går kveld slegen til Riddar av 1. klasse av Den Kongelege St. Olavs Orden. Luther mottok utmerkinga for sin innsats innan norsk fiskeriforvalting.
Lang og tru teneste
Det var fylkesmann i Troms, Svein Ludvigsen, som på vegne av Hans Majestet Kongen stod for seremonien. Ludvigsen sa mellom anna i si grunngjeving at ingen så tidlig, over så lang tid og så tydeleg som Arne Martin Luther, har stått på for å sikre fiskeressursane for komande generasjonar.
– Dette er litt i overkant for meg, eg er jo ei enkel sjel frå landet. Men det er jo ei god sak for fiskerinæringa, Fiskeridirektoratet, mine medarbeidarar og for fisken i havet, seier Luther.
Luther, som går av som regiondirektør i haust, har vore i Fiskeridirektoratet si teneste i 44 år.
Deler med kollegaer og familie
– Eg er veldig stolt og beæra over å få tildelt denne utmerkinga, og deler den med mine medarbeidarar, Fiskeridirektoratet, kona mi og familien, seier Luther.
Den kongelege utmerkinga «Ridder av St. Olavs Orden» vert tildelt som «belønning for utmerkede fortjenester av fedrelandet og menneskeheten».
Vi gratulerer Luther så mykje med den kongelege utmerkinga.
