Betre yngelvern i sør

- Eit steg mot eit meir berekraftig fiske, seier fiskeridirektøren

– Denne reguleringsforma har alt lenge vore eit viktig verkemiddel i forvaltinga av fiskeressursane i Barentshavet. Tiltaket inneber eit steg i retning av eit meir berekraftig fiske i Nordsjøen og Skagerrak, seier fiskeridirektør Liv Holmefjord.

Avgjersla om stenging av fiskefelt som følge av stor innblanding av yngel skal takast på bakgrunn av prøver utført av kystvakta frå fangster frå kommersielle fiskefartøy.

Femtenprosentregelen
Dersom to eller fleire prøver syner ei større innblanding enn 15 prosent målt i tal på torsk, sei, hyse og hvitting under gjeldande minstemål, kan eit område på inntil 500 kvadratnautiske mil i Nordsjøen – og eit område på inntil 250 kvadratnautiske mil i Skagerrak – stengjast i fjorten dagar.

Gjenopnast automatisk
Deretter vert feltet automatisk opna igjen.

Når eit fiskefelt vert stengt, vil alle fartøy som er i nærleiken av området bli informert om dette.

Fiskarane kan også få oversyn over kva område som er stengde på Fiskeridirektoratet sine heimesider.