Betre rusta til å avsløre dumping

Dumping og slepping av fangst er ikkje nokon ny utfordring for Fiskeridirektoratet.

Frå tid til anna dukkar det opp rykter om dumping av fangst, men slike lovbrot er vanskeleg å oppdage utan å vere fysisk til stades. Fiskeridirektoratet er no betre rusta enn nokon gong til å avsløre mellom anna dumping av fisk.

- Dumping av fisk, som vi veit skjer, er kanskje den mest utfordrande kontroll Fiskeridirektoratet og Kystvakten har. Det er viktig å understreke at ansvaret for å unngå dumping først og fremst er næringa sitt eige ansvar. Det er uråd for oss og Kystvakten å vere til stades på alle fartøy og vi må difor utvikle andre metodar for å få mest mogeleg effektiv kontroll, seier fiskeridirektør Liv Holmefjord.

Fiskeridirektør Liv Holmefjord

Risikoanalyse og elektronisk rapportering
I løpet av dei siste åra har Fiskeridirektoratet utvikla nye og effektive metodar for å avsløre fiskejuks.

Mellom anna vil samanstilling av store mengder data frå fiskeflåten til gode analysar kunne hjelpe fiskerforvaltninga til å følge betre med fiskeflåten i forvaltning- og kontrollsamanhang.

- Vi har alt tatt i bruk ulike risikoanalysar for å kunne drive meir målretta kontroll. Frå 1. oktober er det innført elektronisk fangstdagbok for alle fartøy over 21 meter og frå 1. januar 2011 skal også alle fartøy over 15 meter rapportere elektronisk til Fiskeridirektoratet.

- Dette verktøyet vil bli brukt til å lage gode analysar av til dømes fangstsamansetning om bord på fiskeflåten og vi vil kunne reagere raskt dersom fartøy har ein unormal fangstsamansetning i høve til fartøy som ein kan samanlikna med. Dette vil bli ein meir effektiv reiskap mot dumping av fisk enn dei vi så langt har rådd over, seier Holmefjord.

Betre kontroll
Utvikling av elektroniske hjelpemiddel og bruk av risikoanalysar har dei siste fem-seks åra bidratt til betre kontroll med utøvinga av fisket. Ein risikoanalyse identifiserer potensielle risikoobjekt.

Fiskeridirektoratet kan med bakgrunn i analysane rette kontrollinnsatsen inn mot ulike flåtegrupper og type fiskeri til ulike tider på året.

- Satsinga som er gjort dei siste åra har sett oss i stand til å utøve kontroll meir effektivt og med gode resultat. Vi har mellom anna brukt nye metodar inn mot overfisket i Barensthavet, i torskefisket i kystflåten og i makrellfisket for unngå slepping og dumping av fangst, seier fiskeridirektøren.

Fiskeridirektoratet vil på sjølvstendig grunnlag vurdere tiltak retta mot dei to fartøya der det skal ha foregått systematisk dumping av fisk.

Kontaktpersonar:
Fiskeridirektør Liv Holmefjord; 957 56 137
Kommunikasjonssjef Olav Lekve, 958 33 470