Høgare i nord, lågare i sør

Samla var nivået det same for 2011 som for 2010, men innblandinga av rømt oppdrettslaks i dei viktigaste villaksvassdraga er framleis for høgt, viser ei undersøking Norsk institutt for naturforskning (NINA) har gjennomført på oppdrag frå Fiskeridirektoratet og Direktoratet for naturforvaltning.

Nær 2500 prøver analyserte
Førekomst av rømt oppdrettslaks om hausten 2011 er berekna for i alt 36 vassdrag med utvalsstørrelse på minst 20 laks per vassdrag.

Med framleis fokus på rømmingssikring og full effekt av dei tiltak som er sett i verk for å førebyggje rømming, ventar forvaltinga at næringa kan redusere rømminga ytterlegare. Foto: © Fiskeridirektoratet

Rømt oppdrettslaks vart identifisert på grunnlag av vekstmønsteret i skjela, og til saman vart 2 461 skjelprøver analyserte.

Gjennomsnittleg innslag (ikkje vekta) av rømt oppdrettslaks i undersøkinga var 12,8 % i 2011, noko som tilsvarar same nivå som i 2010 (13,1 %).

Skilje ved Stad
Undersøkinga viser at det var eit skilje mellom elvane sør og nord for Stad.

Innslaget i elvane sør for Stad var signifikant lågare i 2011 enn i tre av dei fem føregåande åra. Nord for Stad var prosentdelen høgare i 2011 enn i 2010.

Trur på betring
Innslaget av rømt oppdrettslaks på gyteplassane til villaksen er framleis for høgt. Fiskeridirektoratet arbeider aktivt med tiltak som kan redusere rømming frå fiskeoppdrettsanlegg.

Med framleis fokus på rømmingssikring og full effekt av dei tiltak som er sett i verk for å førebyggje rømming, ventar forvaltinga at næringa kan redusere rømminga ytterlegare.

Det vil gå noko tid før ein reduksjon i rømming vil vise att i innslaget i elvane.