Oppdatering av rømmingssituasjonen

Fusa
Eit av anlegga til Bolaks i Fusa, som stod i fare for å verte øydelagt, er av oppdrettar vurdert som stabilt etter reparasjonar 30.11.11.

Notskifte. Illustrasjonsfoto © Fiskeridirektoratet

Det er planlagt flytting av fisk, og forvalting og oppdrettar har i samband med det auka beredskapen for gjenfangst.

Roan
Direktoratet føl opp hendinga ved Salmar Farming AS sin lokalitet i Masterholman i tråd med sine retningsliner. Det er gjeve førehandsvarsel om teljing av fisk og opptak av not. Veret er framleis så dårleg at den skadde merda truleg ikkje kan inspiserast før neste veke.

Det er ikkje melding om gjenfangst på lokaliteten.

Osen
Marine Harvest Norway AS har lova ut ein dusør på 200 kroner per gjenfanga fisk, og det er sett ut 130-140 garn i området rundt Marine Harvest Norway AS sin lokalitet i Indre Skjervøy. Det er problem med røkting av garna på grunn av veret, men det er observert fisk i garna.

Direktoratet har grunn til å tru at dette er ei større rømming.

Dekk på brønnbåt. Illustrasjonsfoto © Fiskeridirektoratet

Når veret tillet det vil det bli føreteke ny inspeksjon. Tenestemenn frå Fiskeridirektoratet region Trøndelag vil vere til stades når teljing av fisk vert utført og flytta ut av den skadde lokaliteten. Samtidig vil det bli teke DNA-prøver av fisken.

Bømlo
Fiskeridirektoratet har i dag motteke melding om mistanke om rømming frå ei slaktemerd ved Brandasund fiskeforedling i Kastevika. Denne fisken har påvist PD. I følgje Mattilsynet fører det ikkje med seg helseskade å ete fisken.

Kontaktpersonar:

• Hans Haddal – seniorrådgjevar i Fiskeridirektoratet region vest (telefon: 414 46 452)
• Otto Gregussen - regiondirektør i Fiskeridirektoratet region Trøndelag (telefon: 948 89 933)
• Jens Christian Holm - direktør ved kyst- og havbruksavdelinga (telefon: 416 49 170)
• Olav Lekve - kommunikasjonssjef (telefon: 958 33 470)