Русский
EnglishMiljøpris til redningsaksjonen for Vossolaksen
Fiskeridirektoratets Miljøpris for 2011 er tildelt «Redningsaksjonen for Vossolaksen». Arbeidet kom i gang for om lag to år sidan, og alt no viser aksjonen lovande resultat i form av kilenotfangstar i sjøen og vandring oppover vassdraget.
– Årets vinnar driv i høgste grad med eit viktig miljøarbeid som vil koma både oss og våre etterkomarar til gode. Årets vinnar er dessutan eit godt eksempel på at aktørar med ulike interesser kan samlast om eit felles mål. Det er eit eksempel på at samarbeid på tvers av ulike utgangspunkt må til for å løyse ei samansett utfordring, sa fiskeridirektør Liv Holmefjord då ho overrekte prisen under årets Aqua Nor-messe i Trondheim.
«Nå eller aldri for Vossolaksen – plan for redningsaksjon» skal gå i ti år og målet er å få tilbake igjen den vidgjetne Vossolaksen, omtalt som verdas største atlantiske laks. Med bakgrunn i ulike årsaker har Vossolaksen vore omtalt som bortimot utdøydd og det er genmateriale som no blir brukt for å bygge opp igjen stamma. Like før Aqua Nor vart det opplyst at det vert registrert tre til fire gonger meir laks vassdraget så langt i år enn i heile fjor.
«Redningsaksjonen for Vossolaksen» er eit breitt samarbeid mellom elveeigarar i Vossovassdraget, oppdrettarar i Hordaland organisert i Vossolauget, UNI Miljø, Voss kommune, Voss klekkeri, BKK, Fylkesmannen i Hordaland og Direktoratet for Naturforvaltning. Prosjektet er organisert i ein tiltaksdel og ein forskingsdel med ei forvaltningsgruppe på toppen.
Prosjektkoordinator Monika Haugland frå Fylkesmannen i Hordaland og Voss klekkeri, forskingsleiar Bjørn Barlaup frå UNI Miljø og styreleiar Cato Lyngøy frå Vossolauget tok imot prisen på vegne av redningsaksjonen.