Tilrår utfisking og dykkaruttak

Arbeidsgruppa i Pilotprosjekt Hardangerfjorden, som arbeider med rømt fisk og effektane av dette, har utreda om det kan la seg gjere å etablere ei sperre i Etneelva for å hindre rømt fisk i å vandre opp i vassdraget. Det er no klart at dette ikkje let seg gjere inneverande år.

Arbeidsgruppa har difor gjort framlegg om utfisking og dykkaruttak av rømt laks frå oppdrett i Etne og ein rekkje andre vassdrag, kombinert med utvikling av felle i Etne for 2012-sesongen.

Pilotprosjekt Hardangerfjorden, som vart skipa i vinter, er eit nasjonalt samarbeidsprosjekt som tek fatt i dei menneskeskapte faktorane som påverkar dei ville laksefiskane i ferskvatn og det marine miljøet.

FHL og oppdrettarane betalar
Oppdrettarane i Hardangerfjordlauget garanterer for maksimalt 1,315 millionar kroner til å ta ut rømt laks. Det meste vert søkt dekka gjennom miljøfondet til Fiskeri- og havbruksnæringens landsforening (FHL). Det som ikkje vert dekka gjennom dette vil bli dekka av Hardangerfjordlauget.

Havforskingsinstituttet har teke initiativ til å utvikle eit prosjekt for å etablere og teste ut ei oppgangsfelle i Etnevassdraget. Pilotprosjekt Hardangerfjorden støttar dette initiativet, som vil kunne få stor verdi for andre vassdrag som treng eit slikt tiltak.

Oppdrettarane i Hardangerfjordlauget antar at ei felle i Etne kan koste i storleik om lag 2 millionar kroner ferdig etablert i elva. Ei slik felle vil næringa sikra finansiert med eigne og/eller eksterne midlar.

Vil overvake smoltutvandring

Fiskeri- og kystdepartementet har lova ein million kroner til følgjeforsking i Hardangerfjorden. Av desse meiner styringsgruppa i pilotprosjekt Hardangerfjorden at det er rett å sette av inntil 500 000 kroner til følgjeforsking på effektar av lus. Formelt tildelingsbrev på pengane ligg enno ikkje føre.

Styringsgruppa konstaterer at ein no ser resultat av gode prosessar mellom lokale interessentar, forvalting og næring, tufta på ei forvaltings- og forskingsbasert tilnærming.

Kontaktperson:
Jens Christian Holm, 416 49 170
Leiar i Pilotprosjekt Hardangerfjord og direktør ved Kyst- og havbruksavdelinga i Fiskeridirektoratet