Ny forskrift om reaksjonar ved brot på akvakulturlova

Akvakulturreaksjonsforskrifta regulerer forvaltinga sitt høve til reaksjonar i form av å påleggje tvangsmulkt, overtredingsgebyr eller iverksetting av tiltak for den ansvarlege si rekning.

Tvangsmulkt blir pålagt med eit formål om å presse den ansvarlege til å innfri krava som føl av regelverket, og kan påleggjast som dagmulkt eller eingongsmulkt. Den ordinære dagmulkta vil vera 15 gongar grunnbeløpet i folketrygda dividert med 365, og vil dermed etter dagens sats bli om lag kroner 2585,-.

Auka dagmulkt kan påleggjast dersom det er fare for vesentlege skadeverknader på miljøet, dersom den ansvarlege ikkje har etterkome fleire tidlegare pålegg eller dersom det ligg føre andre særlege tilhøve. Den auka dagmulkta skal i så tilfelle utmålast til 150 gonger grunnbeløpet i folketrygda dividert med 365, og vil dermed etter dagens sats bli om lag kroner 25.845,-. Ved påleggjing av eingongsmulkt skal denne utmålast i det einskilde tilfellet.

Vidare regulerer forskrifta myndigheit til å påleggje overtredingsgebyr, samt utmåling av dette. Overtredingsgebyret er ein administrativ sanksjon, som pålegg den ansvarlege for overtredinga ei plikt til å betale eit pengebeløp til statskassa.

Regionkontora får myndigheit til å påleggje overtredingsgebyr i høve overtredingar av meir alvorleg karakter. Dette dreiar seg i hovudsak om forskrifter som ofte blir brotne i samband med rømming av oppdrettsfisk, samt forskrifter om grenser for tillaten biomasse og ulovleg bruk av lokalitet.

Fiskeridirektoratet sentralt vil framleis ha myndigheit til å påleggje overtredingsgebyr ved ytterlegare overtredingar på reglar gjeve i eller i medhald av akvakulturlova.

Utmåling av overtredingsgebyr ved biomasseoverskridingar skal ta utgangspunkt i ein verdi fastsett på bakgrunn av gjeldande brutto salspris for den aktuelle art, jamfør forskrifta § 10. Denne verdien vil bli publisert på Fiskeridirektoratet sine internettsider, og skal oppdaterast kvar månad.

Utmåling av gebyret vil på denne måten sikre at det ikkje skal løne seg økonomisk å produsere meir fisk enn det ein har løyve til. I løpet av mai månad vil gjeldande verdi for april månad verte publisert på Fiskeridirektoratet sine internettsider.

Forskrift om reaksjonar ved brot på akvakulturlova finn du under akvakulturregelverk på Fiskeridirektoratet sine internettsider.