Русский
EnglishEndringar i norsk vassforvalting
I samarbeid med andre etatar er Fiskeridirektoratet i gang med å implementere EU sitt rammedirektiv for vatn, som vil vere premissgjevande for forvalting og bruk av kystsona.
Direktivet vil i framtida vere ei ramme for vassforvalting under norsk lov. Det skal sikre bærekraftig vassbruk og vil gjelde for ferskvatn, grunnvatn og marine vassførekomstar.
– Rammedirektivet vil ha effekt på fylkeskommunalt- og kommunalt planarbeid i framtida og vere premissgjevande for areal- og miljøforvalting. Vassrammedirektivet er den endringa av norsk miljøforvalting som kan kome til å ha mest effekt på oppdretts- og fiskerinæringa, seier Lárus Thór Kristjánsson, rådgjevar ved Kyst- og havbruksavdelinga i Fiskeridirektoratet.
Mogelege endringar i vassforvaltinga
Alt vatn innanfor ei nautisk mil utanfor grunnlinene er regulert av vassdirektivet. I tillegg regulerer direktivet også 20 viktige kjemiske stoff, til dømes PCB, i området ut til norsk økonomisk sone. Desse 20 kjemiske stoffa er alle slike som skal utfasast i Europa. Noreg har forplikta seg til å gjere det same.
– I dag er norsk vassforvalting plassert på fylkesnivå, men i høve til vassdirektivet kan vi få ei inndeling på 5-14 vassregionar, med ei nasjonal referansegruppe, regionale vassregionråd og lokale vassområdeutval, trur Kristjánsson.
Viktige nasjonale avklåringar
Ein har delt norskevassførekomstar inn i ulike typar som beskriv naturtilstanden i dei ulike førekomstane. Status vert sett i høve til avvik frå den definerte naturtilstanden.
Påverknad på vassførekomstane kan vere kjemisk (forureining), fysisk (til dømes inngrep i naturen som eit kraftverk) eller biologisk (introduserte artar).
Planane framover
– Utgangspunktet for Fiskeridirektoratet sitt arbeid skal vere fiskeripolitiske retningsliner, årlege tildelingsbrev og andre sentrale direktiv frå fiskeridirektøren om prosessen. Det er viktig å hugse at om vi ikkje deltek i prosessane vil vi truleg ikkje kunne påverke rammeverket for vassforvaltinga i sjø, seier Kristjánsson.
Fiskeridirektoratet arbeider og med andre viktige prosessar som er i «nær slekt» med vassrammedirektivet. Til dømes kartlegging av biologisk mangfald i kommunane og marine verneplanar.
Lokal medverknad er viktig
Medlemsstatane i EØS skal forankre forvaltinga av direktivet nasjonalt, regionalt og lokalt. Den lokale medverknaden er særs viktig. Det er ein stor grad av fridom når ein skal velje forvaltingsordning, men Brussel skal godkjenne den ordninga Noreg vel.
Fakta
Om EU sitt rammedirektiv for vatn
EU sitt rammedirektiv for vatn vart vedteke av EU 22. desember 2000 og regulerer bruken av vatn; både ferskvatn og sjø. Direktivet skal sikre ei heilskapleg vassforvalting i det einskilde land og har som hovudmål å betre vasskvalitet kjemisk og fysisk. Ein søkjer å oppnå god økologisk og kjemisk status i alle vassførekomstar innan 2015 og seinast innan 2027.
Organisering av arbeidet i Noreg
Det er Miljøverndepartementet som har hovudansvaret for å gjennomføre krava i rammedirektivet. Føringane er det departementsgruppa som legg. Denne gruppa er sett saman av representantar frå Fiskeri- og kystdepartementet, Miljøverndepartementet, Olje- og energidepartementet, Landbruks- og matdepartementet og Helse- og omsorgsdepartementet.
Det er nedsett ei direktoratgruppe som skal samarbeide om gjennomføringa. Statens forureiningstilsyn leier denne gruppa på mandat frå Miljøverndepartementet, som elles er sett saman av representantar frå Direktoratet for naturforvalting, Noregs vassdrags- og energiverk, Mattilsynet, Helsedirektoratet, Statens landbruksforvalting, Kystdirektoratet og Fiskeridirektoratet.